fbpx

شيرفل شوب- قصة نجاح

قصتي كلها انى لما كنت فى ثانوية عامة كان نفسي أدخل اعلام عشان كنت شغالة صحفية و فرقت معايا علي ١٪ تقريبا و دخلت فنون جميلة ماكنتش حباها اوي بس بدأت استغل الحاجة اللي كنت بشوفها كتير زي الالوان والرسومات في حاجة تنفعني. بدأت افكر انى ماكنتش بلاقي لبس كتير في السوق مناسب حتي فى المحلات المعروفة كل الحاجات دي فيها لبس كويس بس مش مناسب للحجاب والحاجات المناسبة بتبقي مش على ذوقى أو عاجبانى ففكرت أفصل هدوم وتبقي حاجة مناسبة لي من اختياري

 

 

ولما بدأت أعمل وأفصل, الناس ابتدت تشوفني وتسألني جايبة منين اللبس دا ففكرت استفيد فبدأت و عملت بيدج صغيرة أبيع عليها تصاميمى. طبعا في الأول كان بيجيلي احباط و ناس تبتعتلي تقولي الحاجات مش مظبوطة و المقاسات مش تمام. و الناس ثانية تقولى سيبك من الكلام دا و ركزي في كليتك الموضوع مش هينجح.

بس أنا مستسلمتش و واحدة واحدة بدأت أظبط في المشاكل دي و ربنا كرمني جدا والحمد لله بدأت أوازن بين كليتي و مشروعى.

أول لما بدأت كان بيجيلي ٥ اوردرات في الاسبوع دلوقتي الحمد لله في الشهر بنطلع أكتر من ٥٠٠ اوردر وبقيت بصدر بره كمان للكويت ودبي وقطر والسعودية. و كمان بقي عندي خط انتاج لي لوحدي في الأول كنت شغالة مع خياطة صغيرة بتفصلي قطعتين علي قدي و دلوقتى بقى عندى خط الانتاج بتاعى

 

أنا عندي ٢٢ سنة وبسافر بره محافظتي الاسكندرية عشان أنقي القماش واختاره و ساعات بجيبه من الصين أو دبي كمان و بهتم جدا انه يناسب الحجاب و فى نفس الوقت يبقى شكله شيك و حلو و جديد

انا حلمي أفتح فروع كتيرة جدا و خارج مصر كمان و يبقي صناعة مصرية تتصدر بره لان حاليا في محلات في السعودية و الكويت و قطر بياخدوا مني وعايزة اكون انا اللي بصدر بأسمى
بحاول أخلي الاسعار مناسبة عشان تناسب كل البنات انهم يشتروا وبعمل كل فترة تخفيض للناس اللي عايزين يشتروا أكثر من تصميم وفكرت فكرة جديدة انى أعمل مايوه مناسب للحجاب عشان شكل المايوهات تقليدي جدا ومافيش حاجة جديدة فعملت تصميم جديد وبعت الكمية كلها فبحاول اعمل كل فترة حاجة تناسب المحجبات وباذن الله قريب هعمل الملابس الرياضية
أنا الحمد لله بقي عندي خط انتاج لنفسي وببيع فوق ال ٥٠٠ قطعة في الشهر و معتمدة علي نفسي في كل حاجة في الأول تعبت كتير جدًا وكنت بقعد أعيط و أقول أنا هفشل والحمد لله ربنا مابيضيعش تعب حد ووصلت لي الى أنا عايزاه و بوجه كلمة لاي بنت انها توصل لي الى هي عايزاه وتتوكل علي ربنا وان شاء الله ربنا هيحققلها كل اللي هي تتمناه
تقدروا تشوفوا تصاميم فاطمة للبراند بتاعها شيرفل شوب و تشتروها من هنا